Mánáidáittardeaddji

Dieđáhus 3.10.2009

Mánáidáittardeaddji Maria Kaisa Aula

Mánáidáittardeaddji Maria Kaisa Aula atná bistteheapmen sosiála- ja dearvvašvuohtaministeriijai ráhkaduvvon evttohusa beaivedikšunlága ođasteamis. Sosiála- ja dearvvašvuohtaministeriija ásahan árrabajásgeassinráđđádallangotti ášši válmmaštallan juogus almmustuhtii evttohusas borgemánus.

- Ođastus galgá laktojuvvot viidáseappot njuoratmánáid bálvalusaide. Ministeriijaid gaskavuođa soahpameahttunvuođa dihte ovdaoahpahus sihke unna skuvlamánážiid iđit- ja eahketbeaivedikšun lea báhcán dál evttohusa olggobeallái. Rabas beaiveruoktu ja riekkisdoaibma ruovttus dikšojuvvon mánáide ii maid leat gieđahallon. Árrabajásgeassin- ja áittardanbálvalusat galget doarjut maid ruovttu bajásgeassima, Maria Kaisa Aula deattuha.

Miehtemielalažžan mánáidáittardeaddji atná bargojoavkku evttohusa beaivedivššu joavkosturrodagaid meroštallamis lágas.

Mánáidáittardeaddji lea almmustuhttán iežas tesaid máná árrajagiid bálvalusaid gárgeheapmin ollisvuohtan. Son evttoha maid váhnenluomu guhkideami unnimusat ovtta jahkái muhto milloseappot bealnnotjahkái. Dasa lassin vuollel 3-jahkásaččaid beaivedikšun galggalii ordnejuvvot álohii bearašbeaivedikšun dehe muđuid ruovttulágánin. - Mađi unnit mánná lea, dađi buoret sus lea orrut ruovttus dehe ruovttulágán divššus. Dán doarju maid ođđaseamos dutkandiehtu máná gárgeheamis, Maria Kaisa Aula ákkastallá.

Bálvalusat galggale dáláža buorebut doarjut njuoratmánáid váhnemiid vejolašvuođaid oasseáigebargui. -Dikšunbeaivve oanideapmi lea dávjá jur mánáid iežaset sávaldat, mánáidáittardeaddji fuomašahttá.

Mánáidáittardeaddji evttoha beaivedikšunlága sadjái mearriduvvot ođđa lága máná árraáittardeami ja bajásgeassima doarjagis. Lága vuođđun galggalii váldit máná vuoigatvuođaid. - Dáláš beaivedikšunlágas váilu máná ja su váhnemiid vuoigatvuohta oassálastit ja váikkuhit dalle go bálvalusat plánejuvvojit ja árvvoštallojuvvojit, Maria Kaisa Aula cealká.

Beaivedikšunságastallama leat hálddašan bargoeallima dárbbut sihke hálddahussurggiid ja ámmátjoavkkuid iežaset deattuheamit. Fuomášupmi galgá mánáidáittardeaddji mielas sirdojuvvot máná oaidninvuohkái ja bálvalusa šládjii. Heajosšlájat dikšun sáhttá leat mánnái árrun.

- Mánnái šládjii gullet oahpes divššarat ja olbmát, unnajovkkoš, muttagis guhkes dikšunbeaivi, ráfálaš stoahkanbottat, bargobottat ja boradeamit sihke vuogas šillju. Dalle maid máná iežas jietna gullo, Maria Kaisa Aula muittuha.

Árrabajásgeassima ja -áittardeami ollisvuhtii galget gielddaid plánain lohkat beaiveruovttuid ja bearašbeaiveruovttuid lassin searvegottiid, musihkkastoahkanskuvllaid, dáiddalágádusaid ja organisašuvnnaid bálvalusat.

Mánáidáittardeaddji cealkámuš njuoratmánáid bálvalusaid gárgeheamis gávdno ollislažžan siidduin www.lapsiasia.fi . Čállosa sáhttá maid diŋgot deaddiluvvon hámis pirkko-liisa.rautio@stm.fi.

SDM:a bargojoavkku evttohus gávdno suomagillii čujuhusas http://www.stm.fi/c/document_library/get_file?folderId=39503&name=DLFE-9933.pdf

Lassidieđut:
Mánáidáittardeaddji

Maria Kaisa Aula
mariakaisa.aula@stm.fi