Mánáidáittardeaddji

Sámediggái gulavaš nuoraid bargojoavku evttoha, ahte sámediggái ásahuvvošii nuoraidráđđi ja nuoraidčálli virgi. Nuoraidráđis livččii vuoigatvuohta bargat evttohusaid ja addit cealkámušaid. Bargojoavku evttoha maiddái, ahte ráđi ovddasteaddji sáhtášii leat mielde ja ovdanbuktit sáhkavuoruid sámedikki ja sámedikki stivrra čoahkkimiin dalle, go dain gieđahallojit nuoraid áššit.

Guđa nuoras, guovtte várrelahtus ja oahpahusministeriija áššedovdilahtus čohkiidan nuoraid bargojoavku lea doaibman guovvamánu rájes oahpahusministeriija ruhtademiin ja sámedikki nammademiin.

Evttohus gieđahallo 30.11. sámedikki stivrras. Das maŋŋá, juos stivra nu mearrida, ášši ovdána sámedikki čoahkkima čoavdimii 16.12.

Mánáidáittardeaddji doaimmahat lea bargan čielggadusa sámemánáid ja -nuoraid vuoigatvuođaid ollašuvvamis Suoma sámeguovllus. Mánáidáittardeaddji Maria Kaisa Aula sávai giđđat 2008 válbmánan čielggadusa vuođul sámemánáide ja -nuoraide buoret vejolašvuođaid váikkuhit skuvllas, ruoktogielddas ja maiddái sámedikkis giela ja kultuvrra guoskevaš áššiide.

Nuoraidráđi vástideaddji orgánat gullet dál juo Norgga ja Ruoŧa sámedikkiid doibmii. Nuoraid oažžun fárrui politihkalaš mearrádusbargamii lea dárbbašlaš earret máná vuoigatvuođaid ollašuvvama dihte, maiddái ovddastusa dáfus.

- Sámedikkis leat 21 lahtu ja sis vuollái 30-jahkásaččat leat dušše guokte. Statistihkkadieđu mielde goittotge sámeálbmogis measta 42 proseantta leat vuollái 25-jahkásaččat, sámedikki prošeaktabargi Anne Länsman muitala.

- Ulbmilin lea, ahte nuoraidráđđái gulavaš, 15-25-jahkásaš nuorat besset oahppat váikkuhanvugiid. Nuoraidráđis sii besset oahpásmuvvat, makkár áššiid sámedikki vehkiin sáhttá bajidit ovdan. Kánske sii movttiiduvvet álgit evttohassan maiddái sámedikki lahtuid válggain, Anne Länsman muitala.