Mánáidáittardeaddji

Mánáidáittardeaddji bargun lea buoridit máná ovddu ja vuoigatvuođaid ollašuvvama Suomas. Mánáidáittardeaddji čuovvu mánáid ja nuoraid buresbirgema ja váikkuha láhkaásaheapmái ja mearrideapmái. Son dahká álgagiid áššiin, mat gusket oktasaččat mánáide ja nuoraide. Son doalvu mánáid oaiviliid diehtun mearrideddjiide.

Mánáidáittardeaddji

• ságastallá aktiivvalaččat ja rahpasit mánáiguin ja olbmuiguin, geat barget mánáiguin. Son doalvu dieđuidis eiseválddiide ja politihkalaš mearrideddjiide.

• son doallá čavga oktavuođa eará eiseválddiiguin, organisašuvnnaiguin ja eará instánssaiguin, mat gieđahallet mánáid áššiid ja dahket mánnádutkamuša. Mánáidáittardeaddji nanne ja buorida ovttasbarggu mánnápolitihkain bargi doibmejeddjiid gaskkas.

• doaibmá almmolaš servodatdásis. Oktavuohtaváldimat mánáin, vánhemiin ja mánáiguin bargi olbmuiguin geavahuvvojit materiálan áššiid ovddideamis. Vuordit earenoamážit mánáid ja nuoraid váldit midjiide oktavuođa.

• barggu vuođđun lea ON:a máná vuoigatvuođaide guoskevaš oppalašsoahpamuš. Lassidieđuid soahpamušas gávnnat dáin siidduin.

Mánáidáittardeaddji bargun lea earenoamážit ovddidit ON:a máná vuoigatvuođaide guoskevaš oppalašsoahpamuša ollašuvvama ja das dieđiheami Suomas.

Mánáidáittardeaddji almmustahttá juohke giđa jahkegirjji, mas árvvoštallat mánáid vuoigatvuođaid ja buresbirgema dili Suomas.

Mánáidáittardeaddji doaibmá sosiála- ja dearvvasvuohtaministeriija oktavuođas iehčanas eiseváldin.

Mánáidáittardeaddji ii

• čoavdde dehe atte cealkámuša ovttaskas máná dehe bearraša áššiin
• doaimma láhkagohccin, soabahallin dehe ášševuoddjin ovttaskas dáhpáhusain.
• sáhte rievdadit nuppi eiseválddi dahkan mearrádusaid iige son gieđahala dáidda guoskevaš váidagiid.
  

Dáin bargguin fuolahit earret eará sosiála- ja skuvlaeiseválddit ja riektelágádus.