Mánáidáittardeaddji Nuorra ráđđeaddit

Mánáidáittardeaddji láhkageatnegahtton bargu lea čielggadit mánáid oainnuid.

Mánáidáittardeaddji bargu lea doallat oktavuođa mánáide ja nuoraide ja gaskkustit sin oainnuid ovdamearkka dihte mearrádusdahkkiide ja ollesolbmuide, geat barget mánáiguin. Dán barggu mánáidáittardeaddji ollašuhttá Nuorra ráđđeaddit -doaimma bokte. Doaibma ovddiduvvo oppa áigge, vai nu máŋgga máná go vejolaš, oainnut gullojuvvojit ja vuhtiiváldojuvvojit mearrádusbargamis.

Mot mánáiguin meannuduvvo deaivvademiin?

Mánát ja nuorat leat mánáidáittardeaddji ráđđeaddit, geaid oainnut čielggaduvvojit deaivvademiin. Juohke jagi lágiduvvojit jahkásaččat 6–10 deaivvadeami iešguđetlágan mánnájoavkkuiguin. Deaivvademiin dehálamos lea addit saji mánáid iežaset oainnuide. Ságastallama sáhttá doarjut ovdamearkka dihtii joavkobargguid, sárgunbargguid dahje govaid bokte. Mánát ožžot dieđuid ovddalgihtii deaivvademiid sisdoaluin ja doaibmavugiin.

Deaivvadeamit lágiduvvojit doppe, gos mánát leat, ovdamearkka dihtii árrabajásgeassimis, skuvllain, nuoraidlanjain ja bálvalusain. Báikki alde deaivvademiin leat álo mánáidáittardeaddji doaimmahaga bargit.

Nuorra ráđđeaddit doibmet golmma vuogi mielde:

Temádáhpáhusat

Temádeaivvademiin čielggadit mánáid oainnuid dihto temás, dego mánáidáittardeaddji jagi deattuhusas. Temádeaivvademiide válljejuvvojit mánnájoavkkut, mat ovddastit iešguđetahkásaš mánáid miehtá Suoma dahje mánáid, geat laktásit iešguđet láhkai temái. Mánnájoavkkuin deaivvaduvvo eanaš oktii.

Jagi 2026 mánáidáittardeaddji jagi deattuhus lei ekonomiija. Temádeaivvademiin ságastalle mánáiguin das, maid ruhta sidjiide mearkkaša, masa sii geavahit ruđa ja masa Suomas galggašii geavahit Suomas eanet ruđa. Deaivvademiide oassálaste vuolleskuvllahasat Espoos, badjeskuvllahasat Oulus ja nuppi ceahki studeanttat Kurikkas. Deaivvadeamit lágiduvvojedje skuvllain.

Nuorra ráđđeaddit -joavkkut

Nuorra ráđđeaddit -joavkkut leat mánnájoavkkut, maiguin deaivvadit 3–5 geardde. Joavkkus ságastallet áššiin, maid mánát ieža buktet ovdan. Joavkkuide oassálastet erenomážit mánát, geat leat muhtin láhkai rašes sajádagas.

Jagi 2024 mánáidáittardeaddji ordnii joavkku nuoraide, geain leat vásáhusat mánáidsuodjalusa sadjásašfuolahusas. Ovttasbarggus Turun SOS-kehittäjänuoret -doaimmain (Turku SOS-ovddidannuorat) ordnejuvvon joavkkus ledje mielde čieža nuora, ja dat čoahkkanii njelljii. Joavku ságastalai sadjásašfuolahusas ja dagai ávžžuhusaid das, mot máná rievttit sáhtášedje buoremus láhkai ollašuvvat sadjásašfuolahusas. Joavkku nuorat oassálaste maid Eurohpa nuorra ráđđeaddiid deaivvademiide.

Galledeamit

Galledeamit leat mánnájoavkkuid ovttaskas dáhpáhusat, main ságastallet mánáid dáfus áigeguovdilis áššiin. Galledemiid sáhttá ollašuhttit gáiddusoktavuođain dahje nu, ahte mánáidáittardeaddji galleda mánáid dahje mánnájoavku galleda mánáidáittardeaddji doaimmahaga.

Jagi 2025 mánáidáittardeaddji galledii Seta doaimmahaga Helssegis ja deaivvadii Seta nuoraiddoaibmagotti ovddasteaddjiiguin. Galledeamis ságastalle arvedávgenuoraid dilis, áššiin, maid galggašii divvut ja áššiin, mat leat bures.

Masa mánáid oainnut geavahuvvojit?

Deaivvademiin mánát ja nuorat sáhttet muitalit oainnuideaset ja váikkuhit áššiide, mat leat sidjiide alcceseaset dehálaččat. Mánáidáittardeaddji gaskkusta máŋgga iešguđet vugiin mánáid oainnuid ollesolbmuide, geat dahket mánáide guoskevaš mearrádusaid. Deaivvademiin ožžojuvvon dieđut ovdanbuktojuvvojit ovdamearkka dihtii mánáidáittardeaddji cealkámušain, álgagiin, bealleváldimiin, ovdanbuktimiin, almmuhusain, čanasjoavkodáhpáhusain ja doaimmahaga gulahallamis nu, ahte ovttage namma dahje heaggadieđut eai boađe ovdan.

Deaivvademiid ságastallamiin ráhkaduvvo maid muittuhančála, mii sáddejuvvo oassálastiide kommenteren ja dievasmahttin láhkai.

Jagi 2025 mánáidáittardeaddji deaivvadii mánáiguin Turkus, Kuhmos, Ristijärvis ja Kotkas. Deaivvademiin ságastalle skuvlejumi ovttaveardásašvuođas. Čoahkkáigeassu mánáid deaivvademiin almmustahttojuvvui mánáidáittardeaddji jahkemuitalusas, mii geigejuvvui stáhtaráđđái.

Jagi 2026 mánáidáittardeaddji ordnii joavkku mánáiguin, geain lea sisafárrejeaddjiduogáš. Joavkkus ságastallojuvvui vealaheamis ja rasismmas. Joavkku oasseváldiid oainnut ovdanbuktojuvvojedje cealkámušas, mii addojuvvui riikkabeivviid bargoeallin- ja dásseárvováljagoddái ovttaveardásašvuođaáittardeaddji riikkabeaimuitalusas.

Jagi 2026 mánáidáittardeaddji attii muitalusas riikkabeivviide. Muitalusas ovdanbuktojuvvojedje mánáid oainnut, maid mánáidáittardeaddji lea čohkken mánáid ja nuoraid deaivvademiin jagiid 2022–2025.

Jagi 2024 mánáidáittardeaddji jovkui oassálaste nuorat, geain leat vásáhusat mánáidsuodjalusa sadjásašfuolahusas. Joavkkus nuorat dahke ávžžuhusaid sadjásašfuolahussii. Nuoraid ávžžuhusain ráhkaduvvui dieđihangihpa, mii juhkkojuvvui mánáidsuodjalusa ámmátolbmuide Mánáidsuodjalanbeivviin.

Loga eanet

Nuorra ráđđeaddit – doaimma etihkalaš prinsihpat