Mánáidáittardeaddji barggut ja doaibmaváldi

Mánáidáittardeaddji bargu lea sihkkarastit, ahte mánáid sajádat ja vuoigatvuođat vuhtiiváldojuvvojit láhkaásaheamis ja servodaga mearrádusbargamis.

Masa mánáidáittardeaddji bargu vuođđuduvvá?

Mánáidáittardeaddji lea Suomas stáhta guovddáš virgeoapmahaš, guhte ovddida mánáid vuoigatvuođaid. Bargu vuođđuduvvui jagi 2005 sihkkarastit, ahte mánáid sajádat ja rievttit vuhtiiváldojuvvošedje láhkaásaheamis ja servodaga mearrádusbargamis.

Mánáidáittardeaddji lea doaimmastis iehčanas ja sorjjasmeahttun. Mánáidáittardeaddji bargu vuođđuduvvá ON:id oktasašsoahpamuššii máná vuoigatvuođain (SopS 59–60/1991), ja dan stivre láhka mánáidáittardeaddjis (1221/2004). 

Maid mánáidáittardeaddji bargá?

Mánáidáittardeaddji čuovvu mánáid eallindiliid ja buresveadjima ja árvvoštallá láhkaásaheami ja servodaga mearrádusbargama váikkuhusaid mánáide. Mánáidáittardeaddji almmustahttá dutkamušaid ja čielggademiid áigeguovdilis fáttáin. Guovddáš oassi áittardeaddji barggus lea čielggadit mánáid ja nuoraid oainnuid ja gaskkustit daid viidásabbot. Mánáid ja nuoraid oainnut čielggaduvvojit earret eará Nuorra ráđđeaddit -deaivvademiin ja Mánnábaromehterdutkamušain.

Mánáidáittardeaddji addá cealkámušaid oassebeliide, geat válmmaštallet mánáide guoskevaš láhkaásaheami. Mánáidáittardeaddjis ii leat eavttuhis geatnegasvuohta addit cealkámušaid, muhto baicca dat doaibmá iežas doaimmahaga návccaid mielde.

Mánáidáittardeaddji raportere áicamiinnis stáhtaráđđái, riikkabeivviide ja ON:id mánáid vuoigatvuođaid komiteai. Mánáidáittardeaddjis lea riekti oažžut eará virgeoapmahaččain bargguidis dikšuma dáfus dárbbašlaš almmolaš dieđuid nuvttá.

Mánáidáittardeaddji dahká vihkkedallamis vuođul álgagiid ja bealleváldimiid mánáid sajádaga buorideami ovdii. Mánáidáittardeaddji álgovurrosaš bargoneavvut leat ovdadeapmi, gulahallan ja dieđu bokte bagadallan. Mánáidáittardeaddji doaibmá nana ovttasbarggus iešguđet virgeoapmahaččaiguin, organisašuvnnaiguin ja eará doaibmiiguin, ja dan barggu doarju stáhtaráđi ásahan mánáid áššiid ráđđádallangoddi.

Mánáidáittardeaddji doaibmá oaivilváikkuheaddjin oassálastimiin almmolaš ságastallamii ja servodaga árvoságastallamii.

Maid mánáidáittardeaddji ii sáhte bargat?

Áittardeaddji ii sáhte gieđahallat váidagiid, guoddalusaid dahje dáhpáhusaid, mat gusket ovttaskas mánáide ja bearrašiidda. Geahča bearráigeahččan- ja guoddalanvirgeoapmahaččaid oktavuođadieđuid ja rávvagiid oktavuođaváldimii.

Mánáidáittardeaddji sáhttá iežas vihkkedallama vuođul almmuhit oainnu ovttaskas dáhpáhusaid vuođul almmolaš dásis máná ovddu ja rivttiid ollašuvvamii. Áittardeaddji bealleváldimiin deattuhuvvojit gažaldagat, main lea prinsihpalaš ja almmolaš mearkkašupmi.

Mánáidáittardeaddji doaimmahat

Mánáidáittardeaddji doaimmahat lea Jyväskyläs. Mánáidáittardeaddji doaibmá vuoigatvuođaministeriija hálddahussuorggis ja lea oassi Riektehálddahusa sierravirgeoapmahaččat -virgedoaimmahagas. Mánáidáittardeaddji doaimmahagas barget áššedovdit, geat ovddidit máná vuoigatvuođaid ovttasbarggus mánáidáittardeaddjiin.